ସେ ଆନନ୍ଦ
ଏ ଆନନ୍ଦ ନୁହେଁ,
ସେ ଆନନ୍ଦ ମିଳେନାହିଁ
କରି କା’ରେ ସାମାନ୍ୟ ବଞ୍ଚିତ
ଅବା କା’ରେ କରି ପ୍ରବଞ୍ଚିତ।
ସେ ନୁହେଁ ବିଷାଦେ ଅବା ଅବସାଦେ କେବେ ବିଖଣ୍ଡିତ।
ଅଖଣ୍ଡ ଅମୃତଧାରା ଶାନ୍ତିରେ ସେ ନିତ୍ୟ ବିମଣ୍ଡିତ।
ସେ ଆଲୋକ
ଏ ଆଲୋକ ନୁହେଁ
ସେ ଆଲୋକେ ଅନ୍ଧକାର ହୁଏନାହିଁ କେବଳ ଅନ୍ତର,
ଲଭେ ରୂପାନ୍ତର।
ହୃଦୟର ଅନ୍ତଃସ୍ଥଳ ଉଦ୍ଭାସିତ କରି
ସେ କରଇ ବିକୀରଣ ଦିବ୍ୟଜ୍ୟୋତି କାଳ କାଳାନ୍ତର।
ସେ ପ୍ରେମ
ଏ ପ୍ରେମ ନୁହେଁ
ନାହିଁ ତହିଁ କାମନା ଜ୍ବଳନ,
ଆବେଗର ଆଡ଼ମ୍ବର, ବିରହ ପୀଡ଼ନ
ଅହଙ୍କାର ଅଭିମାନ ବିରହିତ ରାହା
ପରିପୂର୍ଣ୍ଣ ଆତ୍ମନିବେଦନ ।
ଆତ୍ମ-ଉନ୍ମୀଳନ।
ଦାନ ପ୍ରତିଦାନ ହୀନ ସେ ଚିର ମଧୁର
ଶାଶ୍ବତ ମିଳନ।
ସେ ଆନନ୍ଦ ପାଇଁ ମୋର ନିରତ କାମନା,
ସେ ଆଲୋକ ପାଇଁ ମୋର ନିବିଡ଼ ପ୍ରାର୍ଥନା,
ସେଇ ପ୍ରେମ ପାଇଁ ମୋର ନୀରବ ସାଧନା।